رواية نادرة قلبي بقلم دعاء أحمد

تعبانة غير كدا بيصعب عليا اخليه يجي من الشغل يعمل حاجه

نادرة ابتسمت براحة وهي بتمسك ايدها

حسن طيب وأنتي عرفتي تربيه

دعاء ابتسمت بحب وهي بتربت على كتفها بحنان

الولاد نعمة يا نادرة وتربيتهم عمل عظيم لان احنا مش مهمتنا بس ناكلهم ونشربهم لا يا حبيبتي التربية في حد ذاتها عمل عظيم وأجرها كبير عند ربنا

نادرة ابتسمت وهي بتبصلها

بعد شوية خرجت تبارك وهي شايلة صنية الشاي وخرج معها حسن وهم بيتكلموا

نادرة

على الله تكون نضفت المواعين يا أخينا

حسن

مجتيش تتفرجي عليا يعني

نادرة

خفت اني احرجك

حسن بسخرية

خوفتني تحرجيني ولا خفتي اقولك تغسلي انتي الإطباق

نادرة

مبحبش غسيل المواعين يا حسن

تبارك

الشاي بالنعناع.

بحر قامت وقفت على الكنبة جنب حسن قربت منه وهمست في ودنه بلطف كأنها بتطمن له هو

يا أبو على أنا عايزاه عصير من اللي مامتك جابتلي منه أول ما جيت مش بحب الشاي.

حسن ابتسم بود

حاضر يا ست بحر. بقولك يا ماما في عصير من اللي كنت جايبة منه لبحر

دعاء

اه

حسن

طب ممكن تجيب لبحر منه لان الشاي مش كويس ليها لأنها صغيره

دعاء

حاضر يا حبيبي من عنيا.

بحر صقفت بسعادة وهي بتقعد جانب حسن اللي غمز لنادرة بشقاوة وهي ابتسمت بحب. .

بعد كم يوم حسن كان واقف أدام المرايه وهو بيزرار قميصه وبيجهز لأنه هيروح طنطا في أهم مشوار بالنسبة له حاليا

نادرة

ما بلاش يا حسن تسافر أنا مش مرتاح قلبي بيقولي أن السفرية دي مش هيجي من وراها خير

حسن لف وبصلها وهو مبتسم

متقلقيش كدا أن شاء الله خير وبعدين أنا بس مش محتاج غير دعواتك ليا أن ربنا يوفقني أنا وعامر في المشوار دا بالذات يا نادرة صدقيني لو حصل حياتنا هتتنقل ناقلة تانية خالص وأنا حقيقي محتاج أني اكمل المشوار دا

نادرة

طب هتقعد في طنطا اد ايه

حسن

والله مش عارف ممكن يومين تلاته أو أسبوع بالكتير اللواء كمال قاعد دلوقتي في فيلاته في طنطا ودا انسب وقت اعرف اوصله فيه وأعرض عليه عرض الخواجة اللي اسمه نيكولاس والصراحة أنا لما قعدت معه اتأكد أنه فعلا عايز المراكب وبالمبلغ اللي تستحقه

نادرة

أنت متأكد من الخواجة دا وكمان أنت بتقول أن في ناس واقفين في البيعه علشان متكملش

حسن بابتسامة

اللي ربنا عايزة هيكون يا نادرة لو ليا رزق فيها أنا وعامر صدقيني هناخده وبعدين مش يمكن دا رزق اللي في بطنك والغلبان اللي نايمة في اوضتها دي ادعيلي بس يا نادرة

نادرة

روح يا حسن اللهي ربنا يرزقك من الوسع ويفتحها عليك ويوقفلك ولاد الحلال ويطمن قلبك ويسعدك يا رب

حسن حضنها وغمض عنيه

ربنا يحفظك يا نادرة. المهم تخلي بالك على نفسك وانا هكلمك كل شوية اطمن عليك أنا كلمت امي وهي قالت إنها هتيجي تقعد معاك وتخلي بالها عليك وكمان جليلة قالت إنها مش هسيبك لو تخافي تقعدي لوحدك ممكن تروحي بيت ابوكي

نادرة

متخافش عليا اطمن أنت وبعدين أنا مش هسيب البيت

حسن

طب مش نفسك في حاجة اجيبهالك معايا من طنطا

نادرة بحماس

المدلعة. عايزة المدلعة بيقولو حلوة اوي في طنطا

حسن بمراوغة

والله ما في حد متدلع هنا غيرك أنا بقول ناجل السفر

نادرة

عامر بيرن عليك زمانه تحت

حسن بضيق

الواد دا بيجي في أوقات غلط

نادرة

معليش يا حبيبي بس المهم تخلي بالك على نفسك وبلاش يا حسن تقرب من الڼار ولو حست انك داخل في مكان مش بتاعك والناس دول هياذوك بالله عليك أبعد يا حسن علشان خاطري

حسن باس رأسها وطمنها

خرج من اوضتهم ودخل طمن على بحر اللي كانت نايمة وخرج بعد ما ودع نادرة من البيت نحو الساعة 12 بعد نص الليل نزل من البيت كان عامر واقف بعربية حسن ركب جانبه وهو ساق العربية في طريقهم لطنطا. نادرة كانت واقفة في البلكونة وهي بتبص عليهم قفلت البلكونة ودخلت كانت حاسة أن الموضوع دا مش هيجي من وراه خير دخلت اتوضت لبست الايسدال ووقفت في اتجاه القبلة تصلي بهدوء وخشوع سجدت لوقت طويل وكأنها بالتدريج عرفت ليه حسن كان بيطول في

السجود كل ما الإنسان يكون ليه أمنيات ورجاء بيتمناه بيلجا لله وحده. بيتضرع ليه بقلبه وهو بيدعي. بعد مدة دخلت أوضه بحر نامت جانبها وهي حضنها.

نادرة

يارب أنا عارفة أننا مالناش غيرك بس أنا وبحر واللي في بطني حياتنا كلها متعلقة بوجوده وهو شيلته تقيلة أمه وأخته وأنا وابنه. يارب ارزقه واحميه من أي شړ يقرب منه وأكرمه يارب.

اتنهدت بعمق وحضنت بحر وهي بتغمض عنيها بتحاول تنام.

في الطريق حسن كان ساكت وبيبص من ازاز العربية عامر بيسوق العربية وهو مستغرب سكوت حسن

عامر وحدوه

حسن 

لا اله إلا الله

عامر 

محمد رسول الله. مالك يا أبو على سرحان في ايه كدا

حسن 

بفكر يا عامر. بفكر في اللي جاي

عامر 

يا حسن سيبها على الله ربك كريم

حسن 

عارف يا عامر ومتأكد من دا بس لازم أفكر في كل حاجة بعملها أنا على كتفي حمل كبير ودلوقتي مسئول عن زوجة وطفلة والناس اللي احنا هنقف قصادهم ممكن يمحونا لو مفكرناش صح

عامر

أن شاء الله خير. إن شاء الله أنا بقا بفكر لو الشغلانة دي تمت هعمل ايه بالفلوس هخرج بقا من الحياة دي يا حسن وابعد عن الحي دا وهشتري شقة كبيرة في مكان تاني فخم واخد ابويا ونبعد عن الانفوشي وأنت بقا ناوي تعمل ايه

حسن بصله بغموض ولامبالة

أن شاء الله يا عامر أن شاء الله بس أنا بقا مش معاك في اللي بتقوله دا بص يا صاحبي دلوقتي لو فكرت في شقة وبتاع مش هتعمل أي حاجة لنفسك في المستقبل وبعدين ايه ناوي تشيل ايدك من ايدي ولا ايه

عامر بسرعة

لا طبعا هو أنا هعرف أعمل حاجة من غيرك

حسن بهدوء

أنا هنام يا عامر ساعة كدا وصحيني أنا هكمل سواقة

عامر

ماشي يا كبير

حسن غمض عنيه ونام بهدوء.

تاني يوم الصبح نادرة كانت قاعدة أدام المراية وهي بتسرح لبحر شعرها

نادرة بهدوء وحماس

بص بقا يا بحر بلاش تتخانقي مع حد في الحضانة بس اللي يضايقك هاتيه من شعره متسبيش حقك وأنا هيجيلك لو حصل أي حاجة بس اتكلمي مع البنات وصاحبيهم وسندوتشاتك تاكليهم كلهم.

بحر بضيق طفولي

حاضر يا نادرة هو فين أبو على مش هيجي معايا في أول يوم ليا في الحضانة دا هو كان بيقولي نفسه يشوفني وانا بعرف اقرأ كويس وأنا وافقت اروح الحضانة علشان اعرف اقرأ واكتب زي ما هو عايز

نادرة بابتسامة

أنت بتحبي أبو على يا بحر

بحر ابتسمت بسعادة وشقاوة

بحبه أوي يا نادرة عارفة لو كنت كبيرة شوية كنت خطفته منك واتجوزته أصل هو حلو أوي

نادرة بغيظ

والله عايزه تتجوزي جوزي وانا اقعد اتفرج عليكم وكمان بتعاكسيه يا اوزعة انتي دا جوزي أنا وبيحبني أنا

بحر

اهدي يا نادرة اهدي أبو على امبارح بليل قبل ما انام دخل الأوضة وقالي اخلي بالي عليك أنت والنونو طول ما هو مش موجود والعصبية مش حلوة ليكي وبعدين أنا صغيره اوي اني اتجوز حسن بصي أنا مش هتجوزه بس لما اجي اتجوز هدور على واحد زيه علشان يحبني زي ما بيحبك

نادرة

يخربيتك يا بت